සිස්ටමැටිකලි ගම කන හැටි ඉතාම සරලව පියවර 5 කින් - දෙවන පියවර : ආදායම් වියදම් පරතරය පියවීමට ණය ගැනීම.

අනේ ඉතින් පප්ප ගමේ ආදායමට වඩා වියදම වැඩිවෙලා කෙලවීගෙන කෙලවීගෙන ගියා. ලොකු පප්ප බැලුව මෙහෙම ගියොත් පඩි දෙන්නත් බැරි වෙනවා. එතකොට පප්පලට මල පැනල මාව එලවයි කියල. ඉතින් එයා හිතුව බංකුවෙන් ණයක් අරන් පඩි ගෙවන්න. අනේ ඉතින් පඩි ගෙවන්න ණය ඉල්ලුවට කවුරුත් දෙන්නේ නෑනේ. ඉතින් ලොකු පප්ප බංකුවට කිවව මම මේ ණයෙන් පීසරොටි කඩයක් දාල ඒකෙන් එන ආදායමෙන් ණයයි පොළියයි දෙකම ගෙවනවා කියල. ලොකු පප්ප බංකුවෙන් කහවණු 5 ක් ණයට ගත්ත.

ලොකු පප්ප කහවණු 5න් එකක් හොරා කාල ඉතිරි 4 ඇමති පප්පට දීල මේකෙන් පිසරොටි කඩයක් දාල ණය ගෙවන්න කියල කිව්ව. ඇමති පප්ප කහවණු 4න් එකක් හොරා කාල ඉතිරි 3 නියාමන පප්පලට දීල මේකෙන් පිසරොටි කඩයක් දාල ණය ගෙවන්න කියල කිව්ව. නියාමන පප්පලට කහවණු 3න් එකක් හොරා කාල ඉතිරි 2 වැඩ නොකරන සමිතියෙ ලොක්කට දීල මේකෙන් පිසරොටි කඩයක් දාල ණය ගෙවන්න කියල කිව්ව. වැඩ නොකරන සමිතියෙ ලොක්ක කහවණු 2න් එකක් හොරා කාල ඉතිරි එක වැඩ නොකරන සමිතියෙ පප්පලට දීල කිව්ව, කහවනුවකින් කොහොමද පිසරොටි හදන්නේ ඔයාල පොල්රොටි කඩයක් වත් දාගන්න කියල. වැඩ නොකරන පප්පල කල්පනා කරා පොල් ගාන්නයි ලූනු කපන්නයි ගියාම අපිට වැඩ වැඩියි, පිටි විතරක් දාල රොටි හදනවා කියල. පප්පල පොල් රොටි හැදුවට ඒව පොල් රොටිම නෙවෙයි. පොලුත් නැ, තෙලුත් නෑ, ලූනුත් නෑ, අනේ ඉතින් මුකුත් නෑ, නිකංම නිකං පිටි ගුලි. බල්ලෙකුටවත් කන්න බැ.

අනේ ඉතින් පප්පල කෑ ගහන්න ගත්ත ලොකු පප්පා කහවනු 5ක් ණය අරන් කරපු මගුලක් නෑ. ලොකු පප්ප හොරා හොරා කියල. ලොකු පප්ප කිව්ව, මම ඇමති පප්පලට කහවනු දුන්න, මෙයාලට කිසි වැඩක් බෑ, හොරා හොරා කියල. ඇමති පප්පල කිව්ව අපි නියාමන පප්පලට කහවනු දුන්න, එයාලා නිදා ගත්ත, හොරා හොරා කියල. නියාමන පප්පල කිව්ව, අපි වැඩ නොකරන පප්පලට කහවනු දුන්න. එයාල වැඩ කරේ නෑ. අපි නියාමනය කරන්න ගියාම අම්බානකට නෙලුව, ඉතින් අපි නිදා ගන්නෙ නැතුව මොනව කරන්නද, හොරා හොරා කියල. වැඩ නොකරන පප්පල කිව්ව, ලොකු පප්පලයි, ඇමති පප්පලයි, නියාමන පප්පලයි ණයෙන් බාගයක්ම හොරා කැව, හොරා හොරා කියල.

අනේ ඉතින් පප්පල ඔක්කොම හොරා කාලා වැඩ කරන්නෙත් නැතුව එකිනෙකාට හොරා හොරා කිය කිය ඇනකොටා ගන්නව. ඔක්කොටම හේතුව ගම් සභාව ලොකු වීම බව කාටවත් තේරෙන්නෙත් නෑ, තේරෙන්න මොළේකුත් නෑ, මොළේ තිබ්බනං ඔච්චර කෙලෝගන්නෙත් නෑ. ඒපාර ලොකු පප්ප කිව්ව ඔයාල කළබල වෙන්න එපා, මම ණයක් අරන් වැඩේ ගොඩ දාන්නන් කියල. හැමෝම ලොකු පප්පට ජය වේවා කියල ගෙදර ගිහිල්ල නිදාගත්තා. ලොකු පප්ප බංකුවට ගිහිල්ල කිවව මේ පාර නං ප්‍රොමිස්, මම පිසරොටි කඩයක් දාල ණය ගෙවනව කියල. ඉතින් ලොකු පප්ප කහවනු 5ක් ණයට අරන් එකක් හොරාකාල 4ක්, ආ... ආපහු මුලටම ආව නේද. ඒක තමයි සිස්ටම් එකක් කියන්නේ. දැන් එළ කිරි වගේ ගම කාගෙන කාගෙන යනව. ඊළඟ පියවර වෙන දවසක ලියන්නං.

සිස්ටමැටිකලි ගම කන හැටි ඉතාම සරලව පියවර 5 කින් - පළමු පියවර : රාජ්‍ය ව්‍යවසාය පුළුල් කිරීම

අනේ ඉතින් වැඩේට බහින්න කළින් මුළින්ම බලමු මේ සිස්ටමැටිකලි කියන්නෙ මොන අල ගෙඩියක්ද කියල. සිස්ටම් එකක් කියන්නේ පැහැදිලි ක්‍රමවේදයක්. ඒක පුද්ගලයාගේ හැටියට වෙනස් වෙන්නේ නෑ. එතකොට කවුරු ආවත් වැඩේ කරගෙන යන්න පුළුවන්. ගම කන එක සිස්ටමටික් කරාම සක්කයරය ආවත් කාගෙන කාගෙන යන්න පුළුවන්. 

දැන් ආපහු කතාවට බහිමු. අනේ ඉතින් පප්ප ගම වටේට තිබ්බේ හෝගාන පොකුණ. මීට අවුරුදු බර ගාණකට ඉස්සර පප්පල ඔතනින් එලියෙ ලෝකෙ ගැන මුකුත් දන්නේ නෑ. පප්පල හිතාගෙන හිටියේ පප්ප ගම තියෙන්නෙ ලෝකෙ මැද, ලෝකෙ කැරකෙන්නේ පප්ප ගම වටේට කියල. ඉතින් ඔය පප්ප ගමේ ලොක්ක තමයි හාමු. පප්පල පොඩි පොඩි බිස්නස් කරගෙන හම්බුවෙන ගානෙන් කොටසක් හාමුට දුන්න. හාමු ඒකෙන් හොඳට කාල බීල වෙලාවක් තිබ්බොත් පප්පලගේ ප්‍රශ්ණත් විසඳුව. අනේ ඉතිං ඔහොම ඉන්නකොට පප්ප ගමට ප්‍රජාතන්ත්‍රවාදය කියල එකක් ආව. පප්පලට මේ මොන මගුලක්ද කියල තේරුනේ නෑ. ඉතින් හාමුව චන්දෙන් ආපහු ලොකු පප්ප කරා. ටික කාලෙකින් ගමේ බයියො බඩු ගනං වැඩියි කියල වලි දාන්න ගත්ත. අනේ ඉතින් හාමුව එළවල බඩු අඩුකරන්නන් කියල බයියෙක් ලොකු පප්ප උනා.

අලුත් ලොකු පප්ප හිතුව මේ බිස්නස් කාරයෝ තමයි ඔක්කොම ප්‍රශ්නේ. ඒ නිසා මුන්ව එලවල ගම් සභාවෙන් බිස්නස් කරනව කියල. අනේ ඉතින් දැන් ගම් සභාවෙන් පරිප්පු විකුනන්නයි, අල විකුනන්නයි, මාළු විකුනන්නයි, තෙල් බෙදන්නයි, හැම මගුලම කරන්නයි පටන් ගත්ත. ඒ පාර පප්පල කෑ ගහන්න ගත්ත අපිට බිස්නස් පාඩුයි, අපිට ගම් සභාවෙන් රස්සාවල් ඕන, නැත්තන් චන්දෙ දෙන්නෙ නෑ කියල. ලොකු පප්ප බයවෙලා පප්පල ටිකට ගම් සභාවේ රස්සාවල් දුන්න. රස්සාවල් දුන්නට විතරක් මදිනෙ, පඩිත් දුන්න. ඉතින් පප්පල බැලුව මේක එළ කිරිනේ, බිස්නස් කරනව වගේ නෙවෙයි, වැඩ කරත් නොකරත් පඩි හම්බු වෙනව. අනේ ඉතින් මොන මගුලකටද වැඩ කරන්නේ කියල, පප්පල වැඩ නොකරම පඩි ගත්ත. ඒ මදිවට වැඩ නොකරණ සමිතියක් හදල පඩි වැඩි කරන්නේ නැත්තන් වැඩ කරන්නේ නෑ කිව්වා. වැඩ නොකරනවා කිව්වේ කලින් වැඩ කරපු නිසා නෙවෙයි. කලින් වැඩ නොකර කට වහගෙන හිටිය, දැන් වැඩ නොකර ඒක තව ආඩම්බරෙන් කියන්නත් එනව.

ලොකු පප්ප බැලුව මේ යක්කු වැඩ කරන්නේ නැතුව පඩි ඉල්ලනවා. මෙහෙම ගියොත් මගේ කොටසට තමයි කෙලවෙන්නේ කියල. අනේ ඉතින් ලොකු පප්ප ගම් සභාවේ පප්පල වැඩ කරනවද කියල හොයල බලන්න නියාමන පප්පලව පත් කරා. ඉතින් පත් කරලා නිකන් ඉන්න බැනේ. පඩිත් ගෙව්ව. නියාමන පප්පල බැලුව මේකත් එළ කිරි තමයි, කොහොමත් පඩි හම්බ වෙනවනේ කියල එයාල නිදා ගත්ත. වැරදිලාවත් නියාමනය කරන්න ගියොත් වැඩ නොකරන සමිතියෙන් අම්බානකට නෙලනව. ඉතින් කොහොමත් මුකුත් කරන්න ගියේ නෑ. අනේ ඉතින් ලොකු පප්ප බැලුව ඒ පාර මුන් එකෙක්වත් වැඩ කරන්නේ නෑ කියල, ඒක බලන්න ඇමති පප්පලව අම්බානක් පත් කරා. එයාලටත් පඩි ගෙව්ව. එයාලත් ඉතින් පඩි හම්බුවෙන නිසා නිකන් හිටිය. ඒ මදිවට නියාමණ පප්පලව එලවන්නේ නැතුව ඉන්න නං ජරාව ඉල්ලුව. නියාමන පප්පලත් වැඩ නොකරන පප්පලගෙන් ජරාව ඉල්ලුව. ජරාව දෙන්න ගියාම කහවනු ඉවර වෙන නිසා වැඩ නොකරන පප්පල කෑ ගහන්න ගත්ත. ඉතින් ලොකු පප්පා පඩි වැඩි කරා. පඩි වැඩි කරාට වැඩ කරේ නෑනේ. ඉතින් නිෂ්පාදනය අඩු උණා.

අනේ ඉතින් වියදම වැඩි වේගෙන වැඩි වේගෙන ගියා. ගම් සභාව ලොකු වේගෙන ලොකු වේගෙන ගියා. වැඩ නොකරන වලි වැඩි වේගෙන වැඩි වේගෙන ගියා. එතකොට ලොකු පප්ප පඩි වැඩි කරගෙන වැඩි කරගෙන ගියා. එතකොට වියදම වැඩි වේගෙන වැඩි වේගෙන ගියා. ආ... ආපහු මුලටම ආව නේද. ඒක තමයි සිස්ටම් එකක් කියන්නේ. අනේ ඉතින් එතකොට දිගටම වියදම ආදායමට වඩා වැඩිවෙලා, ගැප් එක වැඩි වෙනව. ඔය ආදායමයි වියදමයි අතර ගැප් එකට අමු සිංහලෙන් කියන්නේ "budget deficit" එක කියල. ඉතින් ඔය මගුල වැඩි උනාම සිස්ටම් එක ෆේල් වෙනවා. එතකොට වැඩේ කෙලවෙනවනේ. ඊට කළින් ඊළඟ පියවරට යන්න ඕන. ඒක වෙන දවසක ලියන්නං.

ජීවිතය යනු කුමක්ද

අනේ ඉතිං අදට වලිය ඉවරයි. ලොකු පප්ප මොනවද කරන්නෙ කියල බලල ආපහු සතියකින් එනව කියල වැඩ නොකරන මහ ලොක්ක කිවුව. වලිය සාර්ථක වීම ගැන එයාට ගොඩක් සතුටුයි.

වලියක් තිබ්බත් අපි කෝච්චි දිව්ව, බැංකු ඇරිය, ඉස්පිරිතාල ඇරිය කියල ලොකු පප්පගේ සූත්තර පුංච කිව්ව. වැඩ කරේ නැත්තන් අන්තරස්දාන කරනව කියල පොඩි තගකුත් දැම්ම. එයාටත් ගොඩක් සතුටුයි. එයා මෙතන බයිල කතා කරනව. අපි ජීවිතේට වැඩක් කරලත් නෑ. වැඩ කරන එකෙකුට කරන්න දුන්නෙත් නෑ. අපිට කරන්න පුළුවන් වැඩක් ඇත්තෙත් නෑ. වැරදිලාවත් වැඩක් තිබ්බත් අපි ඒක කරන්න දන්නෙත් නෑ කියල ලාල් සහෝදර අයිය ආඩම්බරෙන් කිව්ව. එයාටත් ගොඩක් සතුටුයි. අපි උගන්නන්නේ නෑ. උගන්නන්න අපි මොකුත් දන්නෙත් නෑ. මෙච්චර කල් ඉගැන්නුවෙත් නෑ. වැරදිලාවත් ඉගන්නුවනන් මෙහෙම හරක් ටිකක් හැදෙන්නෙත් නෑ කියල ස්ටාලින් ගුරු පප්ප කින්ඩියට හිනාවකුත් දාලම කිව්ව. එයාටත් ගොඩක් සතුටුයි. ඉස්පිරිතාලේ බෙහෙත් නෑ, ඇඳන් නෑ, උපකරණ නෑ, බෙහෙත් දෙන්න දොස්තරලත් නෑ. එයාල රෝමෙට ගියා. ඉතින් අපි ගිහිල්ල මොන රෙද්දක් කරන්නද කියල වෙද පප්ප ඇහුව. අපි මීට කලින් කවදාවත් බෙහෙත් නෑ කියල, ඇඳන් නෑ කියල, උපකරණ නෑ කියල strike කරෙත් නෑ, කරන්නෙත් නෑ, වැරදිලාවත් කරත් ඒ කියන ඒව ලොකු පප්ප අහන්නෙත් නෑ කියල වෙද පප්පත් ආඩම්බරයෙන්ම කිව්ව. එයාටත් ගොඩක් සතුටුයි. එක නැවකට වත් මේ පැත්ත පළාතේ එන්න දෙන්නේ නැතුව කහවණු 1000ක් පාඩු කළා කියල වරායේ ලොකු පප්ප සහෝදරයා හෙන ගැම්මෙන් කිව්ව. එයාටත් ගොඩක් සතුටුයි. අපේ සර් හිටියනං බදුත් නෑ, වලිත් නෑ, තෙලුත් නෑ, මුකුත් නෑ, හෙන ආතල් එකේ තාප්පයක චිත්‍රයක් ඇඳගෙන ඉන්න තිබ්බනේ, එයා තමයි හොඳටම කරේ, හෙහ් හෙහ් හේ කියල මහ හොර පප්ප කිව්ව. එයාටත් ගොඩක් සතුටුයි.

තාම පප්පලට කන්නත් නෑ, බොන්නත් නෑ, බෙහෙතුත් නෑ, ණයත් නෑ, මුකුත් නෑ. ඒත් ජිවිතේ කියන්නේ ඔය විකාර නෙවෙයි. ජීවිතය කියන්නේ සතුට. සතුට කියන්නේ ජීවිතය. පප්පල ඔක්කොටම දැන් ගොඩක් සතුටුයි. මේ වගේ ආතල් බලල අපිටත් ගොඩක් සතුටුයි. ආතල් දුන්නට පප්පලට ගොඩාක් ස්තුතියි.

පප්ප ගමේ වැඩ නොකරණ මහ වලිය

අද පප්ප ගමේ වැඩ නොකරණ මහ වලිය. මීට කලින් ලොකු පප්ප සීසර් අය්යට කිව්වා කන්න, බොන්න, බෙහෙත් ගන්න, පඩි ගෙවන්න සල්ලි නෑ කියල. සීසර් අයිය ලොකු පප්පට කිව්ව ආදායමට වඩා වියදම වැඩි නිසා ණය දෙන්න බෑ, ගැප් එක අඩු කරගන්න කියල. ඉතින් ලොකු පප්පා බදු ගහල ගැප් එක අඩු කරා. බදු වලින් කන්න, බොන්න, බෙහෙත් ඇබිත්තක් විතර අරං ඉතිරි ටිකෙන් රාජ්‍ය සේවකයන්ට පඩි ගෙව්ව. ඒ පඩි වලින්ම රාජ්‍ය සේවකයෝ බදු ගෙව්ව. ඉතිං බදු නැත්තං පඩි නෑ. පඩි නැත්තං බදු නෑ. රාජ්‍ය සේවකයො බදු වැඩියි කිව්ව. ලොකු පප්ප පඩි වැඩියි කිව්ව. කිසිම කෙනෙක් රාජ්‍ය සේවකයෝ වැඩියි කිව්වේ නෑ. එහෙම දෙයක් තේරුනෙත් නෑ. තේරෙන්න මොලයක් තිබ්බෙත් නෑ. මොළයක් තිබ්බනං මෙහෙම කෙලවෙන්නෙත් නෑ.

දැන් රාජ්‍ය සේවකයෝ කියනවා බදු අඩු කරේ නැත්තං වැඩ කරන්නෙ නෑ කියල. ලොකු පප්ප කියනව බදු නැත්තන් පඩි දෙන්නෙ නෑ කියල. සීසර් අයිය කියනව ගැප් එක වැඩි නං ණය දෙන්නෙ නෑ කියල. දැන් කට්ටියම ඇන කොටා ගන්නව. ඒක බලාගෙන අනිත් පප්පල ටික කන්නත් නැතුව බොන්නත් නැතුව බෙහෙතුත් නැතුව ණයත් නැතුව හුල්ලනවා. ඒක දැකල අන්රයිය හිතනවා ඉතුරු ටිකත් කෙලවුනොත් ලොකු පප්පව එලවල රජකම ගන්න පුළුවන් කියල.

වැඩ නොකරන මහ වලියේ පෙර සූදානම

හෙට පප්ප ගමේ මහා වැඩ නොකරණ මහ වලිය පටන්ගන්නවා. 

ලාල් අයිය කිව්වා එක දවසක් වැඩ නොකර ඊට පස්සේ හාමුගෙන් අහල මොකද්ද කරන්නේ කියල කියන්නං කියල. 
රාජ්‍ය සේවකයෝ කිව්වා ඒ ගොල්ලෝ නං කොහොමත් වැඩකරන්නේත් නෑ, මෙච්චර කාලයක් වැඩ කරෙත් නෑ, කරන්න වැඩක් ඇත්තෙත් නෑ, වැරදිලාවත් වැඩක් තිබ්බොත් ඒක කරන්න දන්නෙත් නෑ කියල.