ජෙපි න්යායට අනුව ණය ගන්නාවිට කොන්දේසි දැමිය යුත්තේ සීසර් අයියා නොව ටිංටිං අන්කල්ය. අනේ ඉතිං සීසර් අයියාට මොලේ අමාරුවක් නැති නිසා ණය දෙන්නේ නැත. මේ අතර ටිංටිං අන්කල් සිතන්නේ ගම කැවේ ණය ගත්ත නිසා කියාය. ඉතිං ප්රශ්නය ණය නම් උත්තරයත් ණය නොවන බව අංකල් කියයි. ඒ නිසා ණය ගැනීමේ අදහසක් කොහොමත් නැත. ජෙපි න්යායට අනුව මුලින්ම කලයුත්තේ අන්රයියා ලොකු පප්පා කිරීමය. ඊට පසු අන්රයියා විසින් හතර පෝයටම සිල් ගන්නා, රහසින්වත් පවු නොකරන පප්පලා 20 දෙනෙකුගෙන් යුත් කැබිනට් එකක් පත් කරයි. ඒවගේ සත් ගුණවත් පුද්ගලයන් සොයා ගැනීම එතරම් අපහසු නොවේ. ඔවුන් දැනටමත් ජෙප්පන්ගේ විධායක කමිටුවේ සිටී. අන්රයියා විසින් විධායක කමිටුවේ නම කැබිනට් එක ලෙස වෙනස් කරයි. වැරදිලාවත් කමිටු පප්පන් චන්දෙන් පැරදුනත් අවුලක් නැත. චන්දෙන් දිනපු අය ඉල්ලා අස්කරවා කමිට්ටන් ඇතුලට දාගනී. එය මිට පෙරත් කර ඇති නිසා experience ඇත.
අනේ ඉතින් විධායක කමිටුව කැබිනට් එක වීම නිසා පස්වනක් ප්රීතියට පත්වන රටගිය පප්පන් හෝල්සේල් එකේ ඩොලර් එවීමට පටන් ගනී. දැනට ලැබෙන ඩොලර් මිලියන 500, ඩොලර් බිලියන 2 දක්වා ඉහලනගී. ඒ මොකද කියල අහන්න එපා, එහෙම තමයි. එතකොට තෙල් ඕනෑ තරම් මිලදී ගෙන, නිදහස් සෞඛ්ය සහ නිදහස් අධ්යාපනයටත් වියදම් කර, පඩිත් වැඩිකර, බඩුත් අඩුකර, බදුත් නැතිකර, ඉතිරි වෙන ගානින් ජිම් එකටත් යාහැක. අනේ ඉතින් අවුරුද්දකට ණය ඩොලර් බිලියන 7ක් ගෙවන්න තියනවනේ, ඒක කරන්නේ කොහොමද කියා ප්රතිගාමී බලවේග අසයි. එවිට ඇයි මේ කලබලේ, ටිකක් කල්පනා කර බලන්න, කියා අන්රයියා කියයි.
ණය ගෙවීමට ජෙප්පන්ගේ ක්රමය 2ක් ඇත. පලවෙනි ක්රමය හොරපප්පලා හොරකං කරපු ඩොලර් ආපහු ගෙන්වා ගැනීමයි. මුලින්ම හොර පප්පලා ටික අල්ලා ගනී. දැනටමත් හොර පප්පලා කවුද කියා දන්නා නිසා සහ ෆයිල් තියන නිසා වැඩේ හරිම ලේසියි. ඊටපසු හොර පප්පලා කකුල් දෙකින් එල්ලා කිතිකවා සල්ලි කොහේද කියා ප්රශ්න කරයි. අනේ ඉතින් හොරපප්පලා සල්ලි ගෙදර තියාගන්නේ නැත. ඒවා වෙන වෙන අයගේ නම්වලින් වෙනත් රටවල් වල තැන්පත් කිරීම, දේපල මිලදී ගැනීම, ව්යාපාර කිරීම වැනි දේ සිදුකරයි. ඉතින් අන්රයියා කොහොමහරි මේ නම් ලිස්ට් එකත්, සල්ලි ගැන සියලු විස්තරත් සොයා ගනී. බොහෝ විට මේ සල්ලි තැන්පත් කරන්නේ පප්ප ගමටත් වඩා චාටර් වෙච්ච උගන්ඩාව වගේ රටවල්ය. නැත්තං ස්විස්ටර්ලන්තයේ රහස් බංකු වලය. ඉතින් අන්රයිය මේ විස්තර ටික අදාළ රටවල් වලට යවයි. ඒ රටවල් වලට අන්රයියා පණමෙන් විස්වාසය. ඉතින් කියන පරක්කුවෙන් හොර පප්පලා ටික අල්ලාගෙන, අම්බානකට නෙලා, සල්ලි පප්ප ගමට එවයි. මේ මගින් සෑම අවුරුද්දකටම ඩොලර් බිලියන 10ක් ලැබේ. එම මුදලින් ණයත් පොලියත් ගෙවා තව ජිම් යන්නත් පුළුවන.
ණය ගෙවීමේ දෙවන ක්රමය නිෂ්පාදන ආර්ථිකයක් ඇති කිරීමයි. අනේ ඉතින් ඕක කරගන්න බැරිවී ඇත්තේ ගම්සභාවේ කඩ වලට වැඩ බැරි හොර පප්පන් පත්කර ඇති නිසාය. ඉතින් ගම්සභාවේ කඩ පාඩු ලැබීමට විසඳුම කඩ විකිණීම නොව ලාබ ලබන කඩ බවට පත් කිරීම බව ටිංටිං අන්කල් කියයි. ඉතින් ගම්සභාවේ කඩ 500ට ලොක්කන් 500කුත්, දෙවෙනි ලොක්කා, තුන්වෙනි ලොක්කා, අධක්ෂ මණ්ඩලය, තව ලේකම්ලා, භාණ්ඩාගාරිකලා, එක එක අංශ වල ප්රධානින්, ඔවුන්ගේ ලේකම්ලා, ඔවුන්ව සන්බන්ධිකරණය කරන පප්පලා, ඇතුළු එකී මෙකී නොකී විධායක තනතුරු වලට, සතර පෝයටම සිල් ගන්න, රහසින්වත් පවු නොකරන, පඩි නොගෙන වැඩ කරණ උපාසක බළල්ලු අසුහාරදාහකුත් තවත් එකක් පත් කරයි. ඔවුන් පවු නොකිරීම පමනක් නොව ව්යාපාර කළමනාකරණයේ අත්දැකීම් සම්භාරයක් ඇති අතිදක්ශයන්ද වේ. ඔය වගේ කොලිටි බඩු මෙච්ච්ර කාලයක් හිටියේ කොහෙද කියා අහන්න එපා. අන්රයියා කොහෙන් හරි හොයාගෙන වැඩේ කරනව.
අනේ ඉතින් ඊට පස්සේ වැඩේ හරිම ලේසියි. ඊළඟට කරන්නෙ කාර්යක්ෂමතාවය වැඩි කරන එක. එකට අවශ්ය යන්තර සුත්තර සහ දැනුම රට ගිය සහෝදර පප්පන් නොමිලේම ලබා දෙනව. ඒ මොකද කියල අහන්න එපා, එහෙම තමයි. ඉතින් ගම්සභාවේ විධායක පප්පන් සිල් ගන්නා නිසා ඔවුන් දෙස බලා වැඩ නොකරන පප්පලාද සිල් ගන්නට පටන් ගනී. එතකොට එයාලා ඉබේම හොරකන් නොකරන පප්පලා බවට පත් වේ. ඊට පසු නිෂ්පාදනය වැඩි කිරීමට ඔවුන් දිවා රැ නොබලා වැඩ කරයි. අනේ ඉතින් දිවා රැ නොබලා වැඩ කිරීම කම්කරු නීති වලට විරුද්ධය. අන්රයියා කම්කරු නීති පණමෙන් රකී. ඒ නිසා පප්පලාට වැඩ කරන්න එපා යයි කියයි. ඒත් පප්පලා කියන දෙයක් අහන්නේ නැතිව අම්බානට වැඩ කරයි. වැඩ කරනවානන් කමක් නැත. පඩිත් එපා කියකිය තව බදුත් ගෙවයි. අන්රයියා කොච්චර එපා කිව්වත් අහන්නේ නැත.
අනේ ඉතින් ගම්සභාවේ ආදායම නහුතෙට නගී. ඒ සල්ලි වලින් අන්රයියා බඩු මිළ අඩුකර, පඩි වැඩිකර, හැමෝටම ගම් සභාවේ රස්සාවල්ද ලබාදේ. ණයත් පොලියත් ගෙවා ඉතුරු සල්ලි වලින් ගමේ විශ්ව විද්යාල සාදා හැමෝටම උපාධියක් ලබාදේ. ඔපරේෂන් නොමිලේ කර තව සල්ලිත් දෙයි. වැඩ නොකරන අයටත් ආදායම් අඩු අයටත් නිකන්ම සල්ලි දෙයි. එයාලා එපාම කියයි. ඒත් බලෙන්ම දෙයි. අනේ ඉතින් කොච්චර හොඳද අම්මපා. ඔබත් කල්පනාකාර බලන්න. මේ පාර මාළු මාමටයි.
No comments:
Post a Comment